每個人都有童年，王子與別人一樣，都有童年，回想自己童年冇咩玩，看見人家有超合金，自己想有一份，但他們又點會買! 我童年結果玩甚麼? 印象中我初小玩煮飯仔，啤牌，看家人打麻雀!去到高小開始有d零用錢，再加上當時有星球大戰電影同萬能勇士戰群魔電視，結果我買咗星球大戰3吋高公仔，我亦開始我自製的電視台: 雄偉電台，哈哈.....就係咁，我開設了電視台，自己做劇集，自己做主持，講都唔信。幸得我哥哥深得長輩愛錫，佢有好多公仔，好似通天奇兵公仔、HE MAN公仔，最記得我最鐘意玩他的Lego，當我每次玩都好開心，尤其是起屋!所以好多嘢都係因他而有的，還有還有就是我老表囉!當我係度玩緊d公仔時，佢就玩緊紅白機，我當然好羡慕啦!但始終都係人家的，所以童年真的有點可惜!家人只會買文具給我，所以我咪收集擦膠囉!細過真的看見同學有好多文具，印有卡通人物，而我的文具當然係最平果d囉!
大家都知道我個英文名叫Brian，近年自己又創作了一個新英文名比自己叫做lamperor，但係我細個有好多英文名，一開始小一開始叫做Peter，之後鍾意阿Sam，又叫做阿Sam，跟住見到史泰龍好勁，又叫自己做Rocky，之後尚有Laurence、Edward、Anthony，輾轉之間，叫做Brian，因為自己的偶像叫做Brian Laudrup，做係咁，依個名就用到今天。不過我宜家接出邊的事時多用Bryan。
講起我小學讀書，真的可以講平平無奇囉，係德信小學由小一讀到小六，小一讀1C，班主任係MISS LEUNG，印象己沒有，唯一印象就係我小四去做割扁桃腺，佢的孩子同我一間房，還有還有，就係記得一次入課室時，我係度跳吓跳吓，比佢發覺，我咪留堂，係我第一次留堂，真係哭，阿媽實打死我，結果咪比阿媽打囉，小二去咗一班勁班2A，好有實力，我當然唔得啦，小三去咗3F，應該係最差果班，但係卻令我重生喎，因為班主任又係姓梁，佢對我好好，比班長我做，勤學奬同品行奬都囉過，唔記得係小三取定小六取品學兼優奬，真的好勁喎!結果小四又去咗勁班4C，而我當然又滑落了，記得試過連續多次中文默書都不及格，結果試過叫阿媽將全課默一次，好似好咗，當中發覺自己係聽唔切所成。好慘喎!冇人幫，係小五當然又去返差的班5E，班主任係MISS COOK，好惡的，我試過唔見咗個班長章，佢好惡叫我去D奬盃店買，當時點識喎!結果有一次係小息同佢講，佢講咗以下這一句:「人做班長你做班長，班長章都唔見」好惡，都唔知點解佢點解對我咁惡!去到小六，成績依然冇起色，去咗6A班，班主任係MISS CHAN，好奇怪地佢對我好好，好錫我，我取了品行奬!小學真的好平凡，還記得細過體育堂洪SIR教我哋倒立，我好驚，咪低下頭，但比佢發覺，佢叫我出來試範，當然唔得啦!講起體育上成就，我係小四同小六都試過參與4X100米接力，都係跑第三綫，小四那年我係藍社，得到季軍，有銅牌，而小六我再一次參與4X100米接力，我哋藍社得到金牌，好開心，但之後有老師話我地有人違反規則，最後才知道係我，今天我才知道因為我離開咗接棒區接棒，結果要重賽，我地只得第4，洩氣，我本來以為第一有我份，結果冇了。當時冇人同我講要係接棒區接棒的。就係咁....我運動會只有一個接力銅牌同60米銅牌。回想起小學係好平凡的，有時返上午校，有時返下午校。今天學校仍然係度，但很多很多老師都唔係度了。尚有一件事想ﳺ同大家ﳺ分享，記得那時學校旁有汽水檔，好羡慕人地買汽水飲，我平日只會帶水壺，於是有一天我係家中取了數元，當日我狂買水飲，記得2個小息都買嘢飲，好似一個小息買熱維他奶，另一個小息飲汽水，結果回家肚疴。
童年對於我來說係比較平淡同安靜，點解咁講，同我年齡既人應該有好多活動參加，相對於今天很多人會安排其子女參與不同類別的活動，而我係冇的，我住在尖沙咀，有一間叫基督教服務處的社區中心，但我冇去玩，暑假咁係家中看電視、做暑期作業、玩玩具、等食同等訓囉!就係咁，現在回想真係有d浪費，當時ﱧ應該學吓樂器好似結他、鋼琴、又或者學畫畫，到今天自己沒有甚麼技術，坦白講自己冇咩才藝，甚麼都唔識，足球、羽毛球、乒乓球都係普通囉! 今天唔係太精游水、踏單車、樂器就係咁......現在學，試過啦，怕死囉! 記得當年暑假最多咪去牛頭角同沙田渡假，好開心了，因為可以玩平時冇得玩的東西!記得我大舅父未有小朋友之前，常帶我們去他家玩耍，游水、燒烤、看電影、佢同舅母都好錫我，尤其是當年去沙田穗禾苑，覺得自己好似貴賓咁，記得大舅同我和哥哥去書局買高達膠公仔，早上係公園飲維他奶同食菠蘿包，望住馬場，好好的感覺!當然就係可以坐私家車，好威! 當我大表弟出世後，我同我哥哥都有去沙田玩，早上打網球、踢波等，都幾開心，開心係因為甚麼都有人幫你，冇煩惱。印象最深刻的就是有一個晚上我們靜靜地看公園青年打架。而係牛頭角住，就係過著平靜生活、下午食DYERS 雪糕、啫哩、洗白白都係好安靜，這些生活都仍記得。
我的童年坦白講，係平淡!人家有的，我應該冇!當時我冇埋怨，因為唔識去爭取，又或者知道一定冇得爭取，所以咪玩那些玩意!踏入中學，家人開始給我出街走走，我記得我有一個軍綠色的腰包，我咪自己一個人走走囉!我通常去7，食軟雪糕，因為平，思樂冰太貴了。周圍去，但冇咩錢喎，所以眼看手勿動，初中咪看了足球小將，學人踢波囉，自己有一支足球隊，去過好多地方踢波，九龍公園、大坑東、白田、佐治五世等，之後大家升中後，便開始疏遠了。記得當年8號風球照踢，風雨照去，今天唔得了。不可不提，當時我有一部walkman，不過係爛爛灺，你一定會問是誰送的，係我大舅父，我好開心的，因為當時有一部walkman 係好威，但因為爛蓋，我不會帶它出街，而我亦因為這樣我開始有錄音帶了，第一盒就係譚詠麟的受情陷阱，係我的公公送的，而我自己出錢買的應該係許冠傑的最緊要好玩。好開心，之後愈來愈多，最後好似有超過100盒的錄音帶。
講起歌曲，我其實有廿多首金曲喎，有些大家一看歌名就知，但有些係一些滄海遺珠，同大家分享啦!
BABY (譚詠麟) ---「當當天吹起勁的風 撲向你的佻麗面容 祈求能做對懶蟲 陪
同瑟縮一起過冬」
長 髮 (鄭伊健) ---「我也不很差都有試過 結識新女伴 仍自勉遲早都不用牽
掛」
飄 雪 (陳慧孄) ---「早經分了手 為何熱愛尚情重 獨過追憶歲月 或許此生不會
懂」
難忘你 (許冠傑) ---「曾話過再也不想你 但到今天仍忘不了妳 其實我還是深深愛
著妳」
男朋友 (古天樂) ---「回答我可不可以暫時讓我 講出感覺後 才直說你有男朋友
現在就要走」
舊生會 (李克勤) ---「如若日後婚禮的那天 其實無謂預我 耀眼的鑽戒未能送你
嫌我可以送甚麼」
仰慕者(左麟右李) ---「男孩們 窩心的一吻 誰人還肯送贈 情感 懸空很久了
提起都灰暗」
如果．愛(張學友) ---「如果這就是愛 在轉身就該勇敢留下來 就算受傷 就算流淚
都是生命裡溫柔灌溉」
標準時間(郭富城) ---「讓你與我按照約定在那天終於碰到 於標準時時間趕到」
人生酒庫(藍戰士) ---「霉倒時候 從不多追究 人生到底帶荒廖 如果時日藏千杯苦
酒 都頂起胸襟痛飲 要把杯中苦酒全乾透」
絲絲記憶(張學友) ---「然而為何掀起絲絲記憶 記著妳風中淺笑 記著妳烏黑一縷
長髮 隨著妳那腳步輕輕飄」
你是未來(郭富城) ---「長夜夜長仍是夜 都想跟你碰杯 我的懷念像細雪翻飛風中
淒美得絕配 」
一言為定(黎 明) ---「在那天 哪個說對你好 說了不算 你怕苦戀今天重現眼前
無心等我 慢慢地來表演 只想一眼便看穿」
誰願放手(陳慧琳) ---「愈是懷念你 愈怕沒法一起」
快樂情人(陳慧琳) ---「願日後亦有福看到 各自談情仍彼此羨慕 回頭亦未後悔愛
你的次數」
夜還未深(鄭伊健) ---「難過亦要經過 已是離別我很清楚 未眠如我不止一個 誰沒
有癡過夢過」
查無此人(郭富城) ---「不是說好不聚不散 怎麼說了都不算 如果你已經不想再
談 也該留些話劃上句點」
愛在別離時(許冠傑) ---「如今方知深深愛的你 再獨行一點不習慣」
你是我所有(劉德華) ---「用愛念去一一解咒 讓我為你搬走巨大石頭」
眼神騙不過(黎 明) ---「情人未說不不愛我 但眼神誰騙得過」
夢仍是一樣(譚詠麟) ---「你可知這心 夢仍是一樣 只是你已遠去流浪 不知方向」
相識非偶然(譚詠麟) ---「懷念那天共會面 那日初相見 令我心即刻似觸電 情路挽
手共漫步 永行不厭 我在你 你在我身邊」
長伴千世紀(陳百強) ---「就讓我心永遠的交給了妳 浪漫愛火我每夜回味 今生歲
月 人若老 愛戀不死」
愛情影畫戲(黎 明) ---「求影畫可變真 情人情人不知 暗暗愛你 那天開始 唯求
情人你有天可以 欣賞這個癡心漢子」
眼神騙不過(黎 明) ---「情人未說不不愛我wo 但發現你未快樂誠實地說不不愛我
但我們誰也驚慌分開更頹喪 想說說我的感覺再問你可愛
著我」
知道又如何(譚詠麟) ---「哭得多傷痛 妳可知道又誰 為你在暗自去等情為妳追」
上一次流淚(鄭秀文) ---「都分開了 唯有親手自己治療 如發泄是生理需要 為何眼
淚會缺少」
讓昨天再見(黃寶欣) ---「你看天空依然月圓 地球在轉將不間斷 也許應該追求目
前 誰人願意為你傷心千串」
他喜歡的是你(梁詠琪) ---「就算 不甘心輸給你 都不得不下台 他喜歡的是你 」
一生只有一次(譚詠麟) ---「所有痛苦都留給我 所有美好都留給妳 我會永永遠遠
愛著妳」
獨愛上昨日的你(林保怡) ---「人重逢 我卻別離 抱歉地再次見你 再次別離」
她來聽我的演唱會(張學友) ---「四十歲後聽歌的女人很美 小孩在問她為什麼流淚
身邊的男人早已漸漸入睡 靜靜聽著我們的演唱
會」
一個永遠不好的傷口(譚詠麟) --- 「就是一聲分手 就在短短的一秒以往的愛沒挽
留呆呆地退後 誰關心我心傷透」
除了這些....還有...(張學友) ---「除了這些 還有熱誠 純真 善美 凝望著你
我會笑於心扉 甚麼都不記起 有你便完美」
講起偶像，我童年有好多好多，有石修、惠天賜、苖僑偉、曾華倩、唱歌有譚詠麟、許冠傑、張學友、黃凱芹、陳慧孄、張立基等等，鍾意佢地係幾個原因，有型、靚仔、唱歌好聽，結果我咪買好多佢地相片、唱片、襟章等，細過因為冇咩嘢玩，所以咪看電視、聽收音機。好開心。<<待續>>
